الناس دلوني على واحد قالوا عليه عادل
لما قابلته لقيته بين حرفين بيعادل
بين صاد و ضاد و قال ايه الميزان عادل
و سألنى افرق ما بينهم لو صحيح عادل
خليك مع كلامى لأنه شيء مطلوب
الصاد دى لأي طير في الشباك مغلوب
و الضاد دى ضد كل شيء مقلوب
و لغتنا فى قلوبنا ساكنة و حقها مكتوب
الفرق عنده مش اكتر من اختلاف فى النقط
و الناس في نظره حياتهم كلها فى الغلط
و هو اللى عاطل في عقله كوم من زلط
جيت اعاتبه لامني و قال كفاية عبط
عبط؟!!!.. و ماله ما هو فى الآخر كبيرنا
يا ما آلمنا و ياما على جهله صبرنا
على اد عقله ناخده و هو اللى يؤمرنا
و فاكر انه على هواه راح يسيرنا
طبعاً ده حقه طالما معاه سُلطة
كلامه المزوق بيفرق و أهى كلها سَلطة
و الحق ان أفكاره سببت ورطة
و انا مبادئي مجموعنا صبح غلطة
استاذ بيقول لا قبلي و لا بعدي
اللى هايدفع هو اللى هايعدي
اما اللى يعند مالوش امل بعدى
من هنا كلامى هايبقى له تمن نقدى
كل اللى مطلوب قرشين في مجموعة
و عليّا برشامة رايقة بالغش منقوعة
و كلمة مودة لكل حبايبي مسموعة
و اللجنة هاتسيب عشانى و درجاتكو مرفوعة
عاندت فيها و كان التمن غالي
انكسر جناحى و انا فوق سحاب عالي
انا اللى استاهل كل اللى يجرالي
لو كنت باتساهل ما كانشي ده حالى
موضوع: ايام و عدت 
الثلاثاء يناير 05, 2010 10:22 am
